現年94歲嘅修哥 胡楓，早前舉辦完演唱會後，就減少咗出席公開活動，當時其家人對外表示修哥身體不適，要好好休息一下。不過喺 30號 修哥就喺社交平台，同新抱Jojo一齊以影片交代自己嘅健康狀況，原來早前修哥喺ICU昏迷咗四日！
影片開頭由Jojo交代修哥嘅健康狀況，佢指當時對外指修哥係中咗新冠肺炎嘅原因，係唔想有傳媒去醫院採訪，影響到修哥、其他病患同醫護人員。Jojo指修哥係因為急性膽管炎而入院，當時因為呼吸唔順暢而要插喉，仲喺ICU昏迷咗四日。
片中播出修哥與 鍾志超 醫生嘅對話，對方形容修哥係喺鬼門關打咗轉，修哥聽完就話「好恐怖」，佢又追問醫生自己係咩病，因為病發前佢完全冇跡象，醫生就解釋修哥係膽石跌咗落膽管而引發膽管炎，仲話膽管炎可以好嚴重，因為發炎有機會會令細菌入血，醫生指當時修哥喺好短時間內就休克，血壓亦下降、唔清醒兼危殆。
由於今次修哥係膽石跌咗落膽管，所以醫生除咗幫修哥通膽管外，亦做手術將膽囊切除一，免得有機會第二次發作。修哥聽完就話好感謝鍾醫生同另外幾位醫生及醫護人員，而鍾醫生就話：「唔好咁講，你大命，全香港啲人都鍾意你，所以你天堂打個轉，嗰個上天話你唔好咁快嚟享福，仲有香港好多市民都掛住你，你遲啲先上嚟享福，所以就救返你，都係你自己嘅福氣啦。」修哥就再次多謝鍾醫生，指自己條命係對方救返返嚟。
修哥喺表中又表示，醒咗之後發現自己被五花大綁，醫護解釋因為怕佢係無意識時會扯甩喉同抓傷自己。修哥直言醒返時非常非常辛苦，但幸好醫護人員對佢好照顧，佢又指自己喺睡夢中不斷記起自己嘅家人、所有朋友、契仔契女，佢指每一位自己都想見返，同時又指自己都有諗起為佢打過氣，鼓勵過佢嘅網友。
