今年係梁詠琪入行30年，嚟緊11月佢將會喺紅館舉行三場演唱會，呢日佢為個唱拍海報，Gigi話呢次製作團隊都係同佢合作咗30年嘅並肩戰友，所以佢都好放心交畀團隊打骰呀。Gigi話佢好滿意呢次造型，既有Deep V亦有露長腿，Gigi仲幽默表示叫佢騷其他嘢，佢唔太自在，但騷長腿嘅話，佢就話舒服好多啦。 
回望呢30年嘅精彩日子，Gigi覺得有好多開心又難忘嘅回憶，特別係頭嗰十幾年，Gigi話每日都過住超人生活，嗰種拼勁同熱血，而家睇返都覺得好crazy：「好癲﹗真係無得瞓，喺台灣拍MV拍到5點，跟住搭最早6點幾飛機返香港，一落機即刻去電台通告、去影相，去完探訪返到香港夜晚10點，就去錄音室錄音啊，得返啲車程、搭飛機可以瞓覺，呢啲日子而家諗返都覺得自己好似超人咁，你叫我再嚟多次，我而家已經唔得啦。」
Gigi話自己30年後仍然可以活躍喺呢個圈，除咗係自己對工作嘅熱誠之外，佢亦好感激歌迷多年嘅支持，佢話嚟緊自己會繼續以好奇心迎接每個挑戰。
