馮允謙呢日為新歌《人間缺憾美》拍攝MV，Jay呢次用歌曲向粉絲傳遞溫暖，講出「人生即使唔完美，但仍然可以好美麗」嘅訊息。新歌MV更請嚟曾經同阿Jay喺電影合作嘅資深演員區嘉雯擔綱演出。
阿Jay就話，嘉雯姐嘅角色係患有失智症嘅媽媽，自己就係飾演嘉雯姐嘅仔，MV故事非常感人，令阿Jay睇Rundown嘅時候已經好有感觸，仲忍唔住喊，所以佢都相信呢個MV可以勾起唔少人共鳴。
阿Jay細個嘅時候同嫲嫲一齊住，嫲嫲年紀越嚟越大，亦患上失智症，當時一家人去共同面對呢個問題，所以呢個故事真係對佢有好深嘅感受。
作為乖乖仔嘅阿Jay其實有試過對屋企人發脾氣，佢就話，喺高中嘅時候有一次要趕一份作業，當時媽媽入房幫佢打掃，可能唔小心掂到啲嘢，令文件夾唔見咗。阿Jay發現嘅時候亦有問，係咪有人掂過自己部電腦，雖然媽媽承認有掂過，但阿Jay亦按捺唔住怒火喝咗媽媽一聲。
阿Jay就話，呢件事對佢印象非常深刻，亦好內疚同自責，以後講嘢會更加謹言慎行。
