前港姐陳凱琳（Grace）早前出戰內地綜藝節目，獲老公鄭嘉穎全力支持，忙完一輪工作，Grace趁暑假好好陪寶貝仔，點知噚日有網民喺社交平台貼文公審Grace放任孩子喺睇戲時大聲喧嘩，惹嚟一眾網民熱議，後嚟又有另一位目擊者反駁，稱自己坐Grace後排，讚小朋友幾乖，仲話冇嗰位網民講咁誇張，令事件變成「羅生門」。
Grace嗰日下午1點40分場次喺金鐘睇電影《蜘蛛俠》，並喺限時動態貼出大仔鄭承悅（Rafael）同二仔鄭承亮（Yannick）入場前嘅合照。有網民聲稱自己喺觀影期間聽到三位小朋友「不斷講嘢、大笑大叫，嘈足成場」，佢話「坐正喺佢哋後面都覺得煩」，睇戲嗰陣不斷「殊」、又有叫小朋友靜啲，又指家長任由小朋友喧嘩，「完場戲院開燈先知原來個阿媽係陳凱琳」，惹嚟唔少網民關注。
點知事件爆出冇耐，另一位網民聲稱係同場目擊者，反擊該網民言論，稱自己當時坐喺Grace及小朋友嘅後排，話完全冇嗰位網民講得咁誇張，反而仲覺得小朋友幾乖，反指發文者曾將Cream倒落Grace兒子嘅頭部，Grace喺散場「無啦啦跑得勁快，衝咗出去搵前排個女人」，現場有熱心媽媽遞上紙巾畀佢哋抹乾淨，Grace亦有向戲院職員尋求協助，想搵番該名涉事女人出嚟。
