現年94歲嘅胡楓一向健康又精靈，上月仲完成紅館演唱會，但日前有傳媒聯絡修哥，想佢回應有關四哥謝賢離世一事，可惜一直未能聯絡上，修哥嘅家人代為回覆，指修哥身體抱恙暫時謝絕訪問。
直到7月30日修哥喺新抱Jojo嘅陪伴下拍片報平安，新抱交代早前修哥係因為急性膽管炎入咗ICU，前後更昏迷咗四日，修哥更一度需要插喉，情況危急。不過喺片中所見，修哥已回復精靈，更同主診醫生對話，醫生直指修哥當時身體狀況好危急，直頭係同死神擦肩而過。
昏迷四日走出鬼門關嘅修哥，除咗喺片中憶述甦醒一刻嘅感受外，仲話自己係靠驚人嘅意志去戰勝死神，仲話好想見返家人、朋友同一眾契仔契女呀！
