內地新生代歌手李昊，一連兩場紅館演唱會圓滿舉行，深受前輩愛戴嘅李昊，更收到好多花藍祝賀，好似有譚詠麟、郭富城、張柏芝、周星馳、容祖兒、王祖藍夫婦、張智霖夫婦等等，開show前，一手促成呢次演唱會嘅祖藍同埋有份演出嘅李思捷，亦一齊喺後台同李昊打氣。
演唱會一開場，先由姜晧文同陳國坤齊齊化身江湖大佬，上演一幕古惑仔戲碼，之後藏喺麻包袋入面嘅李昊就爬出嚟，為演唱會揭開序幕‧染咗一頭金髮嘅李昊，狀態大勇，更一口氣連唱多首歌曲，令台下粉絲著迷。
尾場李昊更請嚟甚少喺香港公開露面嘅張柏芝擔任嘉賓，兩人邊合唱，邊上演一幕飲紅酒嘅戲份，佢吔亦不時深情對望及相擁，相當入戲，李昊表示好開心請到女神擔任嘉賓。
呢次嘅演唱會，除咗有靚歌聽之外，亦加插咗一啲小劇場，李昊同林保怡上演嘅父子情嘅戲碼，就令李昊相當感觸，佢談及自己同父親嘅關係，亦忍唔住數度哽咽，李昊坦言以前嘅佢，唔孝順亦都唔聽話，係令父母好擔心嘅小朋友，但而家佢好想比爸爸知道，佢終於圓夢踏上紅館台板。
非常有長輩緣嘅李昊，呢晚更請嚟重量級大前輩林子祥驚喜現身，阿Lam仲話要捱眼瞓都要力撐李昊。祖藍係助李昊圓紅館嘅幕後功臣 ，呢晚有上台同李昊合唱一曲《浮誇》，祖藍仲罕有地唱到歇斯底里。
