校長 譚詠麟 十場紅館騷將於9月開鑼，之前佢講過為個唱揀200首歌，呢次佢喺深圳出席有份投資嘅醫美品牌發佈會，透露個唱籌備進度，指今次個唱係分兩個部分，「無言感激」嗰部分已經練好晒，目前仲排緊舞。
校長坦言準備咗100首歌，就算用唔着都照樣準備好，呢次真係多咗好多工夫。呢日校長好友 曾志偉 及曾擔任品牌代言嘅 馬德鐘 均前嚟撐場，校長仲邀請佘詩曼擔任品牌大使，大讚阿佘靚又皮膚好，仲要有演技同觀眾緣，校長仲話想同阿佘合作拍廣告同MV添！
阿佘話同校長未有正式合作過，之但係自己有參與校長其中一個MV嘅演出，又試過喺《棟篤特工》同場，阿佘笑指唱歌唔夠校長勁，大家可以合作演戲。
阿佘近年塑造「新聞女王」同「正義女神」兩個經典角色，觀眾都好期待阿佘下一部作品，不過阿佘就想放慢工作腳步，想隔一段時間，等觀眾淡忘咗呢啲角色先，之後先重新再拍，暫時會多啲時間留喺香港陪伴家人。
同場仲有趙浚承（Gary）擔任表演嘉賓，首度拍處境劇《愛・回家之三代同糖》擔正男主角，飾演營銷魔術師「楊帆」，該劇於8月10日起隆重登場，Gary呢排幾乎日日開工，佢感謝車婉婉從旁指導，令佢更快進入狀態。
