87歲嘅鋼琴大師 劉詩昆 無懼俄烏戰火陰霾，日前攜同太太 孫穎 同一對寶貝子女 劉蓓蓓（貝貝） 劉天天 一齊遠赴俄羅斯，主辦於聖彼得堡同莫斯科舉行嘅「劉詩昆國際音樂之旅—大師與少年2026」音樂會。
劉詩昆帶領兩岸三地嘅優秀青少年音樂家同台演出，又喺台上演奏《黃河頌》、《我的祖國》等曲目。其實劉詩昆早於1958年，年僅19歲就喺俄羅斯嘅第一屆「柴可夫斯基國際鋼琴比賽」中獲得第二名，更喺當地度過青年求學時期。
今次劉詩昆夫婦又相約俄羅斯前文化部長、行將卸任嘅柴可夫斯基國立音樂學院院長亞歷山大．索科洛夫見面，因柴院正係劉詩昆母校，兩人一見如故，交流甚歡。
今次劉詩昆重回舊地演出，與一眾青少年音樂家，合作傾力演出，仲邀請俄羅斯新生代鋼琴家、拉赫瑪尼諾夫國際音樂大賽冠軍亞歷山大·克柳奇科 （Aleksandr Kliuchko）擔任頒獎嘉賓，劉詩昆感受至深：「音樂無國界，這次帶年輕一代登上國際舞台，就像圓夢一樣。」更透露明年有望同相交幾十年嘅樂團總監左貞觀，喺香港回歸30年之際赴港與芭蕾舞團合作。
音樂會以「傳承」為主題，劉詩昆亦同囡囡貝貝溫馨同台，而年僅2歲嘅細仔天天亦成為全場焦點。天天無懼大場面於舞台上與媽咪 孫穎 溫馨合奏《幸福拍手歌》，音樂會壓軸就由孫穎以琵琶演奏《莫斯科郊外的晚上》，一對子女就在旁伴舞，完美展現音樂世家的超強基因。
