容祖兒 星期六現身太古廣場，為星期一就推出嘅新歌《等等等等》舉行快閃活動，吸引逾500名fans逼爆現場，人潮更由商場中庭伸延至2樓，場面非常墟冚，氣氛更有如小型演唱會一樣。
祖兒凌晨時突然於社交平台開Live，即興宣布嘅快閃活動，號召歌迷到場支持，同參與新歌lyrics video 拍攝。消息一出，fans即時瘋狂響應，短短一晚時間就成功召集唔少歌迷出現。
最令人驚喜嘅，係祖兒一聲號令，竟有歌迷即晚訂機票急飛來港，只為趕上快閃活動。得知有fans為見一面，連夜安排機票抵達，Joey亦非常意外，更直言被歌迷心意嚇一跳，更感受到大家對新歌同自己嘅支持。
清晨6點幾已有大批忠粉到達商場霸位，希望霸佔最佳位置近距離支持偶像。有fans仲表示自己凌晨3點幾先落機，瞓唔夠3個鐘就趕到現場，只為參與呢場突如其來嘅「約會」。
祖兒一到場，全場即時陷入瘋狂狀態，尖叫聲震爆整個商場。今次快閃其實仲有一項秘密任務，就係同現場fans一齊拍攝新歌《等等等等》MV。大會現場首播新歌，祖兒就邊唱邊向四周fans比心，又走入歌迷中一齊跳舞互動，現場氣氛高漲，有如千人派對，連商場二樓圍觀途人都拎出手機狂影。新歌一播完，全場fans更大嗌「Encore」，而向來寵粉嘅Joey當然有求必應。
到活動尾聲，Joey感動向全場歌迷話：「太有心啦！太有愛啦！多謝你哋呀，辛苦晒辛苦晒！今次差唔多啦，希望下次有咁瘋狂嘅活動都預埋你哋好唔好？」而全場就齊聲大嗌回應「好」，氣勢強勁。