莊思明與楊明經歷愛情長跑10年，於8月2日喺馬來西亞吉隆坡舉行婚禮，由於二人圈中人緣甚廣，唔少藝人陸續飛抵當地，見證一對新人重要時刻，首代《愛‧回家》家族幾乎總動員出席，「馬壯」黎諾懿偕同妻兒抵達當地，更同一班家族成員聚餐，而馬國明同湯洛雯被網民影到低調飛咗去大馬。
相中見諾懿聯同《愛‧回家》家族成員張達倫、姚瑩瑩、楊卓娜等，同一對新人一齊食飯，由卓娜舉機影相，眾人開心相聚，諾懿受訪時話因思明係第一代《愛‧回家》家族成員，大家睇住思明同楊明喺埋一齊，因此大家都好戥一對新人感到高興。
至於馬國明噚晚被網民影到帶老婆靚湯到吉隆坡，估計係出席婚禮，另一網民話之前喺金鐘見過靚湯同思明結伴行街，相信兩人份屬好友。靚湯近年看似心廣體胖，連上圍都升cup，屢被傳懷孕，呢次被影到其身形再次成為網民焦點，唔少網民紛紛留言討論，「懷孕了嗎」、「可能是女娃，後面都比較明顯」、「沒有懷，她婚後就胖了」、「應該備孕中，不能太瘦，正常身材」。
楊明一向跟第13期藝員訓練班同學仔感情深厚，有指張美妮等圈中好友亦會出席婚禮，而林峯同楊茜堯就因工作未能到場。