蔡康永 以藝術家身份現身台北一個畫廊活動，佢分享早前喺東京首次舉行畫展時嘅趣事。康永哥表示，其實好多到場嘅都係佢同小S主持嘅綜藝節目《康熙來了》忠實粉絲，所以大家都向佢問候小S，令佢都自稱自己係小S嘅「接線生」。
不過近日台灣傳媒刊出有關大S遺產分配嘅連串報道，令小S同徐家相當頭痛。康永哥就話：「我只能一直對小S保持關心與支持，沒有多問。」亦指無意追問及介入人哋家務事。但佢亦大方分享自己已經立好遺囑，認為呢件事並非唔吉利，反而可以提醒自己，人生中最重要嘅第一位係邊個，而佢嘅第一位就係家人。
康永哥相識滿天下，佢每次搞畫展都會收到圈中好友嘅花籃道賀，喺最近嘅東京畫展除咗有小S嘅花籃，仲有五月天阿信、周杰倫及昆凌。而每次康永哥開展，都有粉絲要求買走偶像花籃上嘅花牌，往往大家嘅目標都係小S，所以更誕生「買畫送花牌」傳統。
不過呢次就唔係小S嘅花牌被最先被買走，而係阿信，康永哥亦向小S講返呢件事，小S就話自己可以排第二，點知第二塊被買走嘅花牌係屬於劉若英嘅！
另一件引人注目嘅事，就係大家喺康永哥分享嘅花籃相上發現言承旭、林志玲呢對昔日情人「同框」，康永哥笑言，當初做拼圖相時自己都猶豫過，所以最終將兩張相拉開少少距離放，而自己都同咗志玲講，志玲嘅態度都好大方。