徐若瑄 日前現身代言活動，Vivian四月底被爆同細佬成立公司打造娛樂帝國，令事業忙上加忙。不過Vivian作為廿四孝媽媽，工作幾忙都好，每個月都會來回台灣、新加坡兩地同長期分隔兩地嘅囝囝「V寶」見面，兩母子仲會按摩聯絡感情。
Vivian除咗做老闆，亦繼續投入專注幕前演藝事業，佢就話最近已經入劇組拍新戲，所以會變得更忙碌。講到最近日本熊本發生大地震，Vivian就話自己有好多好姐妹身處東京，佢都有同朋友聯絡，關心大家嘅情況。
Vivian雖然要兼顧家庭同事業，但佢都好識張弛有道，擁有一套自己嘅生活哲學。Vivian話自己最鍾意創新，即使喺創作上，大家都會寫一樣嘅題材，佢都會特別搵新角度去詮釋，令生活變得更有趣。Vivian亦認為，活到中年，大家喺生活上都會擁有唔同問題，都要搵一個情緒出口先會開心。
最近台灣股巿波動大，唔少人都受到影響，Vivian都笑言身邊嘅工作人員面色麻麻，不過佢就冇受影響。事關Vivian曾經被算命老師批過唔適合投資股票，加上佢唯一一次投資買股票，就遇上2008年嘅雷曼兄弟金融風暴，所以佢從此聽話信邪，唔敢再用買股票做投資。