向海嵐 同 翁嘉穗 呢日兩位港姐冠軍級人馬齊齊一齊參與一個貓迷博覽會，Anne一直都係愛狗之人，上月初其中一隻愛犬離世，令佢非常大打擊，呢日提起都傷心落淚。佢分享時就提到自己貓狗都一樣喜愛，過往就曾飼養過兩隻貓仔，可惜因自己敏感而唔敢再養新主子。
講到月底新一屆港姐師妹就會出爐，Anne就借機會同大家分享心得，呼籲12位候選佳麗好好享受比賽嘅過程，因為係人生難得一遇嘅經歷咁話。
而Virginia就為活動嘅慈善拍賣捐出畫作，早前外遊染上流感嘅佢，就指已經痊癒，仲提到旅程中重返加拿大母校，又獲中學母校邀請拍攝特刊分享，仲指讀書時代已經同校友 佘詩曼 相識，仲話可能有機會齊齊以校服打扮出現在呀。
提到佢早前苦練女團舞嘅網上片段，老公同囝囝都大讚演出，仲指有可能會夫妻檔合體現身舞台咁話呀。
