周星馳 事隔多年推出新作，今個月就會於香港公映，雖然新作口碑兩極，不過於內地就大收旺場，亦令外界回憶過往出現於各部星爺作品當中必不可少嘅一眾綠葉。而近日多位曾先後參與過星爺唔同經典作品嘅成員，就罕有集合一齊，令唔少朋友嘅回憶都一一湧現呀。
好似《逃學威龍》起已出現嘅 細龜 黃一山、《喜劇之王》嘅「洪爺」林子善、《國產凌凌漆》、《大內密探零零發》、《西遊記》系列嘅 羅家英、「如花」李建仁；以及《食神》嘅谷德昭、當然亦包括《少林足球》嘅一眾師兄弟、以及當中飾演汽車維修員嘅 馮勉恒 ，熱愛跳舞嘅豬肉佬 楊能 等等喇。
雖然星爺忙於新片宣傳未有現身，不過圖片中就可見星爺家姐 周文姬 現身與眾同樂，據指呢日係為「大師兄」 黃一飛 慶祝84歲大壽，所以二師兄 莫美林 、近日於台灣獲最佳男配角嘅三師兄 田啟文 四師兄 陳國坤 同埋六師弟 林子聰 都齊齊出席。
據田雞所指除咗大師兄生日、佢本人得獎之外，呢日仲係「小龍」陳國坤生日，加上《功夫女足》大收，身為執行導演嘅肥仔聰自然亦要賀一賀佢喇。
