陳慧琳 近日推出全新單曲《三秒一生》，又同步舉辦Cantopop Party，更特邀人氣DJ組合BEAT FRIDAY擔任打碟嘉賓，以強勁節拍與歌迷同樂，一眾Fans仲紛紛以外星人打扮出席，將現場轉化為成星際舞池，配合MV當中嘅「外星人降臨」意象。
Kelly一現身，就同全場歌迷共同見證《三秒一生》MV首播。當MV出現Kelly經典舞曲專輯《BPM》嘅復古海報時，仲勾起全場歌迷集體回憶，尖叫聲此起彼落。Kelly之後仲驚喜獻唱三首快歌，包括出道後首支推出嘅快歌《唔關你事》，仲有深受喜愛嘅《這班人》同《替換》。全場歌迷又齊齊大合唱，令氣氛更加高漲。
《三秒一生》再由同Kelly合作多時嘅金牌音樂人 雷頌德 親自操刀，更身兼作曲、編曲同監製、許弘毅填詞。MV以極具前衛感嘅科幻設定，探討現代人過度依賴AI科技同社交媒體，逐漸走向情感疏離同精神麻木嘅社會現象。而Kelly就化身為外星「覺醒者」，以強烈節拍同舞步，喚醒人類早已麻木嘅靈魂。
MV中Kelly以電音舞蹈配以極具視覺衝擊嘅造型，將強勁節奏注入城市各個角落，原本靜止麻木、神情空洞嘅人群，亦喺音樂感染下逐漸甦醒，重新尋回身體與情感律動。
MV亦巧妙加入唔少令人會心微笑嘅幽默同致敬元素。除致敬經典專輯《BPM》之外，又加入「蕃茄是外星人」嘅荒謬新聞，展現Kelly獨特嘅玩味風格。