盧海鵬（鵬哥）因為其獨特嘅喜劇風格與機智反應，深受廣大觀眾喜愛，當中「盧海鵬試咪」呢個經典梗，更喺圈中同網上一直流傳，令唔少唔知情嘅人都以為鵬哥私底下脾氣暴躁、郁啲就講粗口罵人。鵬哥早前就喺唔同平台開通社交平台帳號，其中一條影片佢就親自解開「盧海鵬試咪」呢個經典梗嘅由來。
鵬哥指呢個梗嘅起源係早個喺電視台拍外景節目時嘅經歷，當時個外景收音師幫佢戴上無線咪後，就走到勁遠，用鬼剎咁大嘅聲大叫一句：「盧海鵬試咪！」鵬哥聽到後，覺得試咪都係試個聲啫，於是就細細聲講：「X你老母X」講完仲要即刻大聲問對方得唔得，嚇到個收音師即刻話OK，鵬哥仲好得戚咁話如果對方講唔得嘅會再整蠱對方。
因為咁呢個小插曲就廣泛流傳開去，鵬哥話後來唔少人都見到佢都會同佢講「盧海鵬試咪」，鵬哥就搞笑咁話：「咁你即係想我鬧你啫」不過佢話冇可能對觀眾們講粗口，所以就用押韻嘅語句嘅回應，例如「唱得認真威」、「表演得好威」、「匿埋偷雞」。而喺片尾鵬哥亦應現場嘅朋友要求，對鏡頭前嘅觀眾再次一下無粗口版嘅「盧海鵬開咪」呀。
