資深電影人 施南生 7月13日離世，享年75歲。據知喪禮已經低調舉行，而為咗紀念施南生喺影壇舉足輕重地位，家人親友8月2號喺灣仔一間酒店舉行追思會。前夫徐克一早到場打點安排，又為施南生製作一段生活影片喺場內播放，與摯親共同懷緬施南生。
眾多圈中好友巨星到場參與悼念儀式，包括周潤發夫婦、成龍、梁朝偉、劉嘉玲、洪金寶、鍾鎮濤夫婦、譚詠麟、甄子丹夫婦、林子祥葉蒨文、林青霞、張艾嘉、曾志偉、錢嘉樂、黃子華、霍啟剛、向華強夫婦、霍啟剛等，接近3小時嘅追思儀式完畢之後，徐克同林青霞代表向傳媒發言。
林青霞對摯友離世感不捨，頌讚施南生一生對電影界嘅貢獻以及為人，一本書都寫唔完，特別係佢對朋友掏心掏肺，施南生喺醫院最後日子，家人同朋友都每日陪伴，而青霞同徐克更24小時輪流陪喺施南生身邊，佢指施南生喺愛包圍下安詳離開，又特別感謝由世界各地前來嘅每一位好友，青霞視施南生為「永遠的家人」，相伴在側四十四年早已視對方為一家人。
徐克亦代表施南生感激各界，特別係三位音樂人包括羅大佑、伍佰、盧冠廷寫歌獻予施南生，而徐克亦憑歌寄意吐心聲，自己創作咗一首歌送俾天上嘅施南生，而紀念網站亦存放大量施南生生前嘅生活照片，等大家可以懷念往昔。
