楊明 同 莊思明 今日於吉隆坡舉行婚禮，兩人較早前完成傳統敬茶儀式後表示，心情放鬆未有大緊張但非常開心，又分享婚後心情、造人計畫同蜜月安排。
楊明指心情放鬆唔少：「第一階段敬茶順利完成，跟住就進入婚禮儀式，真係好開心。」 而Lisa就話過程非常感動：「見到所有長輩都齊聚一堂，好似終於完成一件佢哋一直以來最期待嘅事。見到老人家笑得咁開心，我自己亦好感動。」
而提到婚後造人大計，楊明就笑稱會「順其自然」，等上天安排，又透露希望可以為家庭增添熱鬧：「之前訪問都講過，希望可以一直生！我自己比較偏好先生一個哥哥，之後再生個妹妹，咁樣哥哥從小就可以保護妹妹。」Lisa就大讚老公心思細密：「佢其實真係好想要個女，但覺得女仔一定要有人保護，所以希望先有個哥哥。」
至於蜜月旅行，兩人就指尚未有具體計畫，楊明解釋話忙完婚禮，兩人隨後都有拍攝工作，所以打算先專心處理工作與返港後慶祝活動。Lisa就補充話：「因為香港有太多朋友同幕後同事過唔到嚟，特別係公司一齊相處十幾年嘅好兄弟姐妹。所以我哋想先喺香港籌備一個大派對，同大家再慶祝一次，蜜月之後隨時都可以去。」楊明仲爆料話老婆其實非常易滿足，就算去韓國嘆美食都非常高興。
而 大家姐 莊思敏 就指，現場氣氛歡樂溫馨，自己選擇以最實惠嘅現金作賀禮，認為現金可以等一對新人買心儀用品，雖然送首飾戴起好睇，不過現金最實際。 仲大方表示唔希望新人有生兒女壓力，一切順其自然就得，最重要兩人幸福美滿、好好相處。
提到婚禮重頭戲「拋花球」，原來現場有唔少單身好友，非常期待搶花球環節。仲點名幾位好友包括 吳沚默、劉晨芝 同 關嘉敏 等：「好多人都好想拍拖，特別想關嘉敏搶到，因為《女神》配對唔成功，希望佢哋有機會接到花球，分享好運！」