早前先同囝囝Jaco到大馬同泰國父子出遊嘅視帝 陳山聰 ，日前應邀遠赴紐約，為《第23屆美國華裔小姐競選》擔任特邀表演嘉賓同冠軍頒獎嘉賓。已25年未有踏足當地嘅山聰坦言心情興奮，更連16小時長途機程都興奮到完全冇瞓過呀。
山聰此行所到之處都被熱情粉絲包圍要求合照，不過最令佢始料不及嘅，係每位粉絲見面後都會追問：「Jaco呢？」當地粉絲都大讚Jaco既靚仔又可愛，令身為老竇嘅山聰笑言：「原本真係想帶埋Jaco過嚟，但考慮到16小時機程太辛苦，又怕小朋友適應唔到時差。不過而家知道紐約咁多人鍾意佢，下次再有機會嚟我一定會帶埋Jaco，等佢親自同當地粉絲見吓面！」
一向對抗扮極有要求嘅山聰，於呢次華姐總決賽共獻唱6首歌曲，佢先以一身大蝴蝶結白色恤衫襯黑色絲絨褲霸氣登場，勁歌熱舞《狂野之城》同深情歌曲《喜歡妳》；之後換上極型格黑色西裝加絲巾，引爆全場女士尖叫。現場熱情女粉絲大叫「好靚仔」，又叫佢落台互動，山聰就發揮幽默本色話：「我走落台咪畀你哋溶咗！」
大會又安排山聰同五強佳麗合演佢代表作《金宵大廈》嘅經典場面，山聰仲不斷「爆肚」考佳麗急才。最終表現最為出色嘅7號佳麗 林雅雯 再順利勇奪冠軍，山聰就透露賽前已非常睇好佢，果然有眼光。
今次嘅大會司儀 余思霆 同 山聰相當有緣，因為9年前Stitch來港參加華裔小姐競選並奪得冠軍時，山聰正好擔任當年外景嘉賓；今次異地再於美國華裔小姐舞台重逢，兩人就覺得緣分非常奇妙喇。
山聰今次遠道飛到紐約，工作後佢亦留低當地享受幾日假期，除完成多年心願喺紐約中央公園跑步外，又把握時間到百老匯欣賞著名嘅《MJ Show》，行程收穫豐富。山聰仲話希望未來有更多機會到紐約開騷，同美加地區粉絲見面。