香港明星籃球隊「星BA」，日前宣佈，邀請 鄭俊弘、內地網劇一哥 張添景 、內地網紅兼籃球員 高宇鋒 同 蘇勇燁 加盟球隊。幾位新成員上月中就聯同隊員 莊思敏 、彭迪安 、陳柏曦、陳偉洪 、呂熙、李興華、江梓瑋 同 陶大衛（筷子基），以及西安網紅球員 周嘉豪 同 徐通，獲陝西省海外聯誼會邀請，到當地安康嵐皋村BA主場館，參加《“橋心杯”全國籃球邀請賽》，上月尾再到順德體育中心參加《籃球明星賽》，順德站仲由 阮兆祥 出任開球禮嘉賓。
上月中於陝西舉行嘅《“橋心杯”全國籃球邀請賽》，「星BA」出戰陝西省高校僑聯聯盟代表隊，隊中有「3分王」之稱嘅 陳柏曦 再度成為隊中MVP，投入6球3分成為得分王，加上莊思敏、陳偉洪、江梓瑋等落力表現，最終「星BA」以62：54贏得賽事。
比賽休息期間，「星BA」一眾隊員仲為現場球迷表演，唱出隊歌《Together We Play》之外，鄭俊弘又同陳柏曦及陶大衛穿上長衫演唱《中國人》、《龍的傳人》同《大中國》串燒版，今次係Fred成為隊友後首次代表演出，佢話：「我以前都未試過着長衫，仲喺呢個咁正嘅氣氛之下，唱一批咁有中國風嘅歌，真係好難忘嘅經驗。」
今次當地村BA吸引15個國家國際友好、全國16個省份共100多支球隊齊聚同台競技，而「星BA」一眾成員，今次陝西行除參邀請賽外，又爭取時間參與唔少文化旅遊活動，好似參觀知名景區同品嚐唔少當地美食。
而到月底「星BA」轉往順德參加《籃球明星賽》，出戰順德文旅明星隊。雖然當日撞正颱風「紅霞」來襲，令交通大受影響，不過出任開球禮嘉賓嘅阮兆祥，就深得現場觀眾歡迎，令現場氣氛更熱烈。由於兩隊球隊都有女隊員，所以「星BA」未能利用莊思敏「雙倍分」優勢，與順德文旅明星隊分數一直互相緊咬，4節後打成95：95平手，需加時作賽，最後更以黃金11分定勝負，可惜「星BA」最終以107：99落敗。
而比賽休息期間，鄭俊弘又再代表球隊獻唱《熊貓》同《天不會錯》，而祥師兄就同現場球迷大玩遊戲。賽後受訪時，莊思敏竟被爆場邊落淚，佢就解釋其實自己負「傷」上陣：「我真係負傷上陣，但係傷風個傷，唔覺我把聲好性感咩！」
對初嘗敗陣，隊員都未有太失望，新加盟嘅鄭俊弘更大讚好玩：「我係負責唱歌嘅，波都掂咗少少，同埋都有負責跑，不過真係好好玩，因為識咗好多新朋友，又有啲舊同事又可以聚埋一齊，又可以去唔同地方觀光同打波，一齊食飯，非常之開心，多謝大家預埋我玩。」
於《福祿壽訓練學院》成為阮兆祥徒弟仔嘅 陳柏曦 同 陶大衛 陪同下受訪，祥師兄話：「可以同順德嘅朋友見面梗係開心。通過籃球可以同唔同地方嘅朋友交流，真係件非常好嘅事，期待『星BA』可以去到其他唔同地方，通過籃球比賽散發多啲安多酚，大家都會開心啲。」
問到同兩名徒弟會否合作時，佢就話：「呢兩個徒弟身上都有好多優點值得大家去欣賞，今日就籃球比賽，私下都可以有唔同合作機會，無論係演藝上又好，運動上面都好，或者『星BA』見到我落場打波都未定呢？！不過我都會操一操先，好狀態之下都會毛遂自薦同大家打場波，到時我唔係叫兆祥，叫落場啦，哈哈！」