近年嘅婚禮除咗流行喺現場安排即影即有自拍亭，畀賓客影相留念外，仲流行安排駐場畫師，為賓客速繪獨一無二嘅似顏繪作紀念品。剛剛喺吉隆坡舉行婚禮嘅 楊明 與 莊思明 ，亦喺婚禮上請嚟曾與多個知名奢侈品牌合作嘅時尚插畫師 纤惠（Hwi），為一眾賓客繪製獨特嘅婚禮紀念品。
Hwi喺自己嘅社交平台PO出當日為賓客繪畫嘅情況，見佢拎住畫板穿梭喺酒會現場，為一眾賓客 馬國明、關嘉敏Carman、姚瑩瑩、梁麗翹、何芷姍（原名：何綺雲）等速畫大家嘅OOTD。
由於Hwi大多數都係企喺賓客附近靜靜繪畫，直到完成畫作先上前將成品遞畀對方，所以每一位賓客收到畫作時都相當驚喜。當然亦有賓客見到Hwi嘅作品後，企定定擺出唔同pose畀Hwi畫，就好似Carman咁，就專登擺出個側身pose畀對方繪畫，突顯出佢嘅白滑美背喇。
除咗幫賓客速繪外，Hwi亦有幫一對新人佢哋穿上婚紗行禮前嘅畫面，見新郎哥楊明收到畫作時亦相當驚喜，相信佢哋都非常滿意。
