楊明 與 莊思明 結束10年愛情長跑，8月2號喺馬來西亞吉隆坡甜蜜拉埋天窗，婚禮前一日，佢哋舉行婚前派對，廣邀親朋好友玩番晚啦！
一對新人喺敬茶儀式，身穿中式傳統禮服，新娘思明身穿華麗嘅馬來褂，頭戴精緻鳳冠，頸上有極具份量嘅金豬牌，手戴上多對龍鳳鈪，金光閃閃盡顯貴氣，二人喺儀式上，數度落淚，場面相當感人。
二人晚宴場地以藍紫色為主調，充滿浪漫夢幻氣息，三百位賓客到賀，見證二人幸福時刻，薛家燕、黎諾懿、馬國明、湯洛雯、樊亦敏、何晉樂、鄺潔楹、王海榛及關嘉敏等圈中好友出席。家姐莊思敏及黃建東擔任婚禮司儀，莊思敏主持宣誓儀式時，因太緊張而唔小心講錯嘢，問思明願唔願意喺在場賓客見證，「嫁楊明為你合法妻子」，思明打咗個突，跟住掩嘴大笑，同時亦全場大笑。
思明對老公楊明講嘅愛的宣言亦非常感人，新娘子自認脾氣差，幸好有老公包容及遷就。一對新人面對當地傳媒時，大方放閃錫唔停，而一眾賓客都玩得好開心，傅明憲更化身新娘專用頂酒員，肥媽為一對新人高歌助興，搶花球環節由馬蹄露接到，馬蹄露都非常興奮。 
