關心妍全新巡迴演出繼廣州首站後，上星期六移師澳門舉行。因為開騷前一日係Jade生日，所以呢場「生日會專場」驚喜不斷，同期新人 蕭正楠 化身「蛋糕專員」為Jade賀壽，不過就蝦碌發現時冇準備打火機，Edwin要即場向觀眾「借火」，吹蠟燭之後Jade高呼：「我47歲喇！」而Edwin就話：「年齡唔好講，我哋雖期出道但我大過你㗎！我對外報稱自己35歲咋！」
Edwin又話說：「我真係好佩服Jade，咁多年唱歌保持得咁好，對音樂仍然堅持，我哋同期仲喺樂壇嘅好似已經冇乜，我都好想有機會開騷，到時請返你做嘉賓。」Jade就回應話：「我知你最近都有做騷，我都有留意。」Edwin笑言：「嗰個係同兩位叔叔一齊開㗎咋。」令全場笑爆！
Jade同Edwin都係2002年樂壇新人，當年合唱嘅《特別鳴謝》係經典合唱歌，今次再同台演繹，勾起唔少樂迷唱K回憶，呢晚亦同歌迷齊齊大合唱。
Jade亦為呢場演出調整歌單，首唱三首作品《那些傷我也有過》、《像我這樣的一個雅茲迪女子》和《總有一天》。而獻唱《那些傷我也有過》時，Jade一度哽咽含淚演唱。呢首歌係紀念出道20周年推出。但因概念專輯焦點集中於「療癒三部曲」，所以《那些傷我也有過》從未派台，今次Jade演唱會首唱，令歌迷驚喜又感動，歌迷更紛紛要求重新派台。
完騷之後，Jade換上露腰套裝接受傳媒訪問，令後台嘩聲四起，Jade自信話：「造歌衫時我仲係114磅，估唔到五個月會去返2012年紅館騷嘅100磅，但係健康嘅，我食好多蛋白質，早睡早起做好多運動，希望保持呢個狀態，又大一歲希望又條腰又fit一吋啦。」今年係Jade入行25周年，佢計劃巡演明年尾站於香港舉行，希望可以第五度踏上紅館舞台與歌迷慶祝。
