曾風靡50至60年代嘅華語影壇與歌壇一代傳奇；「曼波女郎」葛蘭，8月3日下午離世，享年93歲。消息由文化人鄧小宇於社交平台公佈。
被譽為集聲樂、舞蹈與演技於一身嘅葛蘭 本名張玉芳，1933年生於上海，1949年隨家人遷居香港。自幼就跟隨名師學習聲樂，同時拜崑曲大師 俞振飛 門下。佢1950年代加盟「電懋」後，1957年於電影《曼波女郎》中，將爵士樂與拉丁舞蹈完美融合紅遍東南亞，奠定佢「歌舞巨星」嘅尊貴地位。
到1960年主演改編自西洋歌劇《卡門》嘅代表作《野玫瑰之戀》，將野性潑辣又迷人嘅歌女形象塑造得淋漓盡致，主題曲《卡門》與《說不出的快活》至今仍舊流傳，更被無數後輩翻唱。葛蘭亦憑《星星月亮太陽》等大作名留後世，又曾客串於香港取景；奇勒基寶等主演嘅荷里活電影《江湖客》，成為首位登上美國影視作品表演嘅香港女演員。
1964年，事業正如日中天嘅佢同富商 高福全 成婚，隨後就毅然選擇息影，儘管已離開幕前數十載，不過佢喺《我要你的愛》、《說不出的快活》嘅歌聲，一直橫跨幾個世代，成為華語流行文化中重要一環。
