藝人陳浚霆憑TVB處境劇《愛．回家之開心速遞》飾演「風少」成功入屋，劇組於7月底煞科，陳浚霆趁完成拍攝後，出遊放鬆唞一唞，今日喺IG上載全身長滿紅疹嘅獨照，原來佢去法國行山時發生意外。
陳浚霆今日喺社交平台透露喺法國行山後，紅疹從手掌延伸到手臂及面上，以致布滿全身 ，行程期間情況越嚟越嚴重，最後更延伸到喉嚨引致條脷紅腫，飲食講嘢都有困難。
陳浚霆曾喺當地求診，診所轉介佢去睇急症室，「急症室等了半天的驗血報告，得到的結論就是我被某些昆蟲咬了後產生了敏感的反應，雖然依然感到不適，去到其他城市再求診，但情況都是一樣」。
陳浚霆返港立刻去睇醫生，已經被轉介入院，「醫生話我最快要8月9號（希望可以早啲）先可以同大家見面」，陳浚霆仲講笑稱由於整個旅程都喺診所病床或醫院度過，佢冇時間買手信，陳浚霆話平安歸來就係「你的手信」。
