楊明 同 莊思明 日前於吉隆坡舉行盛大婚禮，相戀多年終於修成正果甜蜜恩愛。今次婚禮星光熠熠，大批圈中好友專程飛抵當地親身祝賀，共同見證溫馨時刻。而當中感人一刻，相信就係加入AI技術拍攝而成嘅婚禮影片喇。
影片以極具電影感嘅手法，穿越與復古刻畫阿楊同Lisa嘅愛情故事，片中先見到Lisa穿越到古代，遇上危機嘅佢獲將軍英勇拯救，之後又於漫天風雪中相擁、身穿日式和服共賞煙花，之後又身穿白色西裝同婚紗騎電單車奔馳，重現《甜蜜蜜》、《天若有情》等經典場面。
不過最震撼嘅催淚彈，就係影片重現Lisa已故父親 莊寶 嘅身影，片中新外父以溫柔語氣，向重回幼童時代嘅Lisa同女婿送上叮嚀同祝福。
現場響起久違亡父聲線時，會場瞬間被感動氣氛包圍，新娘Lisa當場落淚，新郎楊明亦雙眼通紅，一眾親友同賓客亦被影片打動，場面溫馨又令人動容。
