TVB處境劇《愛·回家之開心速遞》本周一至周五晚八點翡翠台播映結局周。 8月3號嗰集「後來的我們」，「安Bon」感情線終於迎嚟結局，「金城安」周嘉洛一邊壓抑對「Bonnie」林凱恩重燃嘅愛火、一邊努力營救被軟禁喺吳旺達嘅「蔥頭」丘梓謙，救出蔥頭亦意味住安仔與Bonnie「假婚姻」將要結束。
安仔想出各種古靈精怪理由拖延辦理離婚手續，被媽媽熊尚善一言驚醒，安仔決定放下過去、約見Bonnie「離婚」，並送上最真誠卻又最揪心嘅祝福，「原來大個仔唔單止要學識承擔，仲要學識放低唔屬於自己嘅嘢」、「其實我幻想過好多次點同你結婚，但我從來冇諗過要同你離婚」、「結婚嗰陣錫一啖，離婚嗰陣又有個Goodbye Kiss，咁對我哋嘅婚姻嚟講，都叫做有始有終」，安仔收起平日輕佻、一面情深，向舊愛送上最成熟嘅祝福，Bonnie一臉感動，強忍淚水哽咽回應：「咁我都祝福你，金城安，以後都要幸福快樂，多謝你安仔。」
一連兩集《愛‧回家》讓觀眾睇到安仔喺呢10年間暴風成長，安仔離婚後對媽咪熊尚善講嘅一番話：「Bonnie心入面已經有蔥頭，我同佢又已經過去咗，既然已經過咗去，就唔應該望番轉頭，有啲嘢錯過咗就由佢錯過啦。」
「安Bon」呢番感人嘅互相祝福，令劇迷既傷心又感觸，一夜之間爆起連番「安Bon集體回憶」，唔少網民讚廢青安終於大個仔，指「安Bon」呢個結局唔爛尾，戲如人生，有時錯過咗就係錯過咗，留下遺憾先至係最好，放手其實都係一種愛。代入「安Bon戀」嘅網民，指出金城安遭遇，與蜘蛛俠Peter Parker有得揮，力推周嘉洛係港版蜘蛛俠最佳人選。
雖然「安Bon」因Timing問題未能喺埋一齊，但編劇仲努力為安仔尋找「好歸宿」，以及「滿滿的愛」，負責送愛就係安仔老Best朱凌凌及「刀子嘴豆腐心」嘅熊尚善。
朱凌凌拎住兩碗象徵「Bonnie對安仔照顧」嘅八爪魚腸仔蛋麵，闖入安仔房間，安仔見狀後極感動捉實朱凌凌問：「Can you take care of me forever？」朱凌凌聞言爽快回覆：「我話咗我養你吖嘛！」期間不忘來個忘情擁抱，兼含住啖麵開心互動，網民亦大為感動，紛紛為「安凌Broship」喝采。
