由亞洲電影大獎學院主辦，與及文創產業發展處、電影發展基金 同 香港駐曼谷經濟貿易辦事處支持嘅「香港電影巡禮」於泰國曼谷舉行，活動開幕電影為 陳心遙 監製、新晉導演 胡翠兒 執導； 周家怡 金燕玲 陳湛文 楊雅文 同 張迪文 主演嘅《媽樣年華》。
呢部即將於下半年上映；「第七屆首部劇情電影計劃」大專組得獎作品嘅導演 胡翠兒 同女主角 周家怡 親赴泰國出席開幕儀式同映後分享會，與泰國觀眾近距離交流，出席嘅仲有香港演員 林子傑 同 戴玉麒 ，而「泰國男神」《出貓特工隊》查朗桑提納托古（Chanon Santinatornkul，暱稱Nonkul）同另一泰國演員Mean（Phiravich Attachitsataporn）亦應邀出席活動，與香港團隊同台參與揭幕儀式。
周家怡與Nonkul驚喜相遇，兩人同場合照又短暫交流，Nonkul憑《出貓特攻隊》走紅，近年亦活躍於華語影視作品，更曾拍攝賣座電影《一秒拳王》，與香港電影界早有淵源；而家怡同樣作品不斷。今次佢於《媽樣年華》中，挑戰學習鋼管舞上跌跌碰碰嘅家庭主婦角色，展現中年女性勇敢追夢嘅力量，家怡同導演又同泰國觀眾分享拍攝過程中嘅趣事。
日前先由馬來西亞國際電影節回港，隨即就轉往曼谷，家怡指對東南亞觀眾印象深刻：「完全唔會攰，反而係充滿能量，因為泰國同馬來西亞觀眾好熱情，笑容滿面咁歡迎我哋，聽到觀眾嘅笑聲，連男性觀眾都有共鳴份外驚喜，加上同導演Joey一齊經歷佢嘅首部作品嘅影展之旅，覺得非常值得。」
家怡親身挑戰高難度鋼管舞，練習期間更曾骨裂需休養個半月，佢話：「呢部電影令好多媽媽覺得可以『搵返自己』。好高興可以帶住呢部作品去唔同地方，令更多人見到香港電影，同埋有更多母親感受到被理解同被支持。」 而身為Gen Z嘅導演 胡翠兒 ，亦分享同家怡踏上紅地毯嘅感受：「對我嚟講係好特別嘅經驗。拍《媽樣年華》時佢成日鼓勵我，亦好信任我呢個新導演。今次再一齊走上紅地毯，感覺好似帶住部戲繼續成長，好感動，亦好感恩有機會同佢一齊將呢個故事帶去唔同地方。」
