IdG Bubbles 雖然出道至仲未夠一年，不過就已推出6首作品，近日仲為炎熱嘅夏季推出第7首全新創作歌曲《夏日狂閃》。新歌除以夏日為主題，靈感亦來自網上熱話，因為IdG Bubbles 嘅Fans以閃光燈瘋狂拍攝，令佢哋被笑稱為「閃燈女團」，新歌就以此為主題，成員Anesa 話：「歌詞裡面有幾句係「影我影我」同「閃呀閃呀」，好似形容我哋啲Fans咁樣，亦希望我哋呢首歌可以同歌詞一樣無規範，開開心心去玩。」
MV特別得到樂園允許，於開園前無人時段拍攝，7位成員包括Cindy 、Anesa、小倬、Kathy、Yoyo、夢月同Kaluen更首度以水著look上鏡，務求令整個MV熱度再升溫。
Cindy話：「為咗拍呢個MV，我哋特登揀選7款唔同顏色同各有風格嘅水著示人。」而小倬就話：「拍攝當日真係玩得好開心，因為真係無諗過可以喺水上樂園拍MV，當初聽到嘅時候已經好興奮。」
至於Anesa就話：「今次應該係玩得最開心嘅一個MV，原本都擔心化妝同頭髮濕咗會點，但因為真係好好玩，我哋都冇理太多，反而出嚟個效果好自然。」Kathy就興奮回想：「我哋有一部份要自拍玩急流漩渦，導演原本已經收貨，但因為我哋貪玩，希望再嚟多一個，而我哋嘅尖叫聲，仲俾現場嘅工作人員笑我哋爭啲爆咪。」
問到以水着出鏡有冇壓力時，7位少女就搶答話：「未拍之前都怕有尷尬，拍攝當日天氣好好，環境又好玩，所以冇得驚太多，而我哋仲不經不覺曬黑咗，但係唔緊要啦，最緊要出嚟效果好，同埋呢個MV真係好好玩。」
