剛過去嘅1號係 何沛珈Roxanne 正日生日，佢專登揀呢日舉行粉絲見面會，原本只預計十幾人到場，但當壽星女見到人數比預期多一倍時，感到相當意外同感動。
Roxanne指今次似「答謝會」多於生日派對，為答謝粉絲一直支持，佢特別準備咗8份禮物作抽獎，更設「任影唔嬲」環節，粉絲可以盡情同佢合照留念，又因為Roxanne多咗唔少登台唱歌嘅機會，呢日佢都特別以歌會友，贏盡全場掌聲。
呢次生日會Roxanne嘅契仔、契女同家人都有出席，佢直言家人平日甚少有機會見到自己工作時嘅一面：「今次雖然唔算係正式工作，但難得可以俾佢哋見到，原來有咁多人咁錫我、咁愛我，我爹哋見到都好感動。」
而每位粉絲都準備咗禮物送畀壽星女，對此佢就話其實內心相當矛盾：「我其實唔想佢哋使錢送禮物俾我，但當親手收到嘅時候，真係好感動，因為入面充滿住佢哋嘅心意。」
當中令Roxanne印象最深嘅，係一位粉絲將佢嘅樣印喺朱古力上，創意十足；而最令佢感動嘅，則係契仔親手畫嘅一張卡。何沛珈笑言：「畫工雖然唔係大師級，但係份心意真係令我好感動。佢亦透露一個小心願：「如果將來我有能力嘅話，希望下次可以為每一位嚟到嘅粉絲都準備一份禮物。」
除了見面會以外，何沛珈亦分享今年自己最大嘅「禮物」係新劇《非份之罪》出街，更得到唔少觀眾嘅喜愛：「真係冇諗過大家會喜歡我演出，我亦收到好多網友留言，好受寵若驚。」佢同時借機會力推自己嘅新作：「希望大家可以多多關注嚟緊嘅新劇《夫妻的博弈》，希望可以得到好嘅收視。」第二個願望則相對樸實——希望身邊所有人都身體健康。
至於感情狀況，正參與《女神配對計劃2》嘅佢透露，坦言現階段更希望覓得一位可以長遠一齊行落去嘅伴侶：「而家嘅我已經29+1，唔會好似以前咁心急、咁衝動，反而希望可以慢慢嚟，搵一個真係可以長久行落去嘅人。」