吳業坤 x 胡鴻鈞《Kwan-derful Moments》演唱會分別於7月30號喺加拿大多倫多、8月1號於美國洛杉磯圓滿舉行，兩場演出均座無虛席，吳業坤（坤哥）與胡鴻鈞（Hubert）憑精彩演出，為來自北美各地樂迷送上一個難忘嘅音樂晚上。
坤哥與Hubert多年嚟友誼深厚，呢次透過音樂串連二人喺演藝路上嘅成長歷程與重要時刻。從相識、並肩追夢，到各自於音樂道路上發展，兩人今次再度同台，以歌聲細訴一路走來嘅故事，為整場演出注入真摯而溫暖嘅情感。
首站來到加拿大多倫多，演唱會當晚現場氣氛熾熱，美國洛杉磯站作為是次北美巡演嘅壓軸演出，同樣吸引大批樂迷到場支持。演出開始前，場外已聚集大批觀眾等候入場，人潮絡繹不絕，準備投入呢個特別嘅音樂晚上。
場內特設 TVBAnywhere North America 攤位，推出「幸運大抽獎轉盤」活動，送出多款精美紀念禮品，吸引唔少觀眾踴躍參與。粉絲紛紛與人氣吉祥物 TV Buddy、TVB海外吉祥物 TVBi，以及吳業坤與胡鴻鈞 1:1 人形紙牌打卡留念。現場同時發售演唱會官方限定應援物，包括 LED 應援頭箍及紀念公仔立牌，唔少樂迷即場選購，為稍後演出做好應援準備。
演唱會由坤哥與Hubert合唱《情非得已》揭開序幕，配合舞蹈員充滿動感嘅編舞及華麗燈光效果，為演唱會打響頭炮。全場觀眾手持大會派發嘅應援燈棒熱情應援，隨後二人重唱當年參加《超級巨聲 2》時首次合唱《友共情》，相隔多年再次勾起觀眾集體回憶，兩人默契十足，瞬間炒熱現場氣氛。
Hubert接連深情獻唱劇集《十月初五的月光》主題曲《祝君好》、劇集《降魔的》片尾曲《遙不可及》、劇集《逆天奇案》主題曲《逆襲》、劇集《把關者們》片尾曲《明知故犯》，以及劇集《殭》片尾曲《天地不容》等代表作。演繹《天地不容》時，舞蹈員配合充滿張力嘅編舞登場，於燈光與歌聲交織下，營造出極具戲劇感嘅舞台效果。
坤哥獻唱劇集《金式森林》插曲《還剩一件未做的事》，其後接連演繹《傷心到變形》、《原來她不夠愛我》、《原始心態》及《百姓》等人氣作品。其中《傷心到變形》與《原始心態》均配合舞蹈員演出，隨住熟悉旋律響起，觀眾紛紛跟隨節奏合唱，坤哥亦不時與台下互動。
坤哥與Hubert獻唱《到此一遊》時，走落舞台與觀眾近距離互動，沿途向粉絲揮手、握手及送上笑容，將現場熱烈氣氛由舞台延伸至觀眾席。緊接着合唱《陽光點的歌》，二人先重返舞台，二人於演唱會尾聲，以《謝謝你的應援》及《感激》向多年來一直支持佢哋嘅歌迷表達由衷謝意，歌曲結束後，兩位歌手向觀眾揮手致意，現場燈光亦逐漸暗下。
全場持續高喊「Encore」，坤哥與Hubert再次登台，分別為兩地觀眾送上限定驚喜。多倫多站特別加唱《分分鐘需要你》及《今生今世》；洛杉磯站則以《分分鐘需要你》作為限定 Encore，將現場氣氛再次推向高峰，在觀眾熱烈掌聲與歡呼聲中，北美巡演正式落下帷幕，為呢趟音樂旅程畫上圓滿句號。
