新劇《夫妻的博弈》呢日舉行首映禮，一眾劇中演員 何廣沛 郭柏妍 張頴康 鍾柔美 等都有現身，同在場嘅粉絲一齊睇首播，而呢日咁啱係Matthew正日生日，劇組好sweet咁送上生日蛋糕，有咁多人陪壽星一齊慶祝，Matthew今年生日過得特別難忘，佢仲話希望年底嘅婚禮可以順順利利舉行。
高Ling同劇中飾演佢年輕版嘅Yumi，同款造型引爆網民熱烈討論，唔少網民驚訝佢哋點解可以似到一模一樣？高Ling覺得佳導喺揀選演員方面真係眼光獨到，出嚟效果亦都好有驚喜。
呢次高Ling角色非常坎坷，既患胃癌又親眼發現自己嘅老公同閨蜜偷食，劇情咁悲慘，難怪高Ling一邊睇一邊愁眉深鎖。阿康同Rosita搞到高Ling咁慘，佢哋直認喺劇中係真‧人渣，阿康話呢次同Rosita有超多親蜜戲份，為咗拉近同Rosita嘅年齡差距，阿康特登去減磅，希望唔好俾觀眾感覺二人似父女啊﹗
