五月天瑪莎聯同黃韻玲等多位音樂人出席佢哋共同策劃嘅音樂節活動。瑪莎上個月完成五月天巡迴演唱會尾站後，就同家人前往倫敦度假，更被媒體發現佢喺多地置業，笑指佢係「地產大亨」，享受完假期，瑪莎就要準備音樂節演出。
瑪莎就話未試過同女主唱嘅樂團合作，自己亦冇辦法加入范曉萱嘅樂團，加上告五人就冇Bass手，所以佢覺得呢個係自己嘅機會。瑪莎仲話一直被說服唱歌，但佢就認為自己一個Bass手去唱歌嘅話，實在係「隱善揚惡」，瑪莎最後決定會唱歌，係覺得有犬青呢個真主唱喺度，自己都冇乜好驚。
瑪莎除咗係五月天嘅Bass手，亦醉心幕後工作，推動流行音樂文化發展，亦做過一個音樂展覽嘅策展人。瑪莎分享自己嘅策展初衷，認為所有從事流行音樂工作嘅人都值得被尊重，亦希望鍾意聽音樂嘅人會被展覽感動。
瑪莎覺得大家都會聽音樂，但鍾意音樂嘅人好少，有幸做到同音樂相關工作嘅人更加少，而可以用呢份工作去養活自己、令自己開心嘅人又更少，所以瑪莎希望大家知道，自己做緊嘅事係值得被大家尊重同尊敬，流行音樂除咗可以令大家聽到開心同得到感動，亦希望大家知道自己做緊一件好重要嘅事。