劉浩龍相隔8年再喺麥花臣舉行演唱會，獲圈中大批朋友拉大隊捧場，好似有陳國坤一家三口、鄭希怡一家三口、郭偉亮同太太葉佩雯、 吳國敬、林家棟、小肥、彭健新、林盛斌、王秀琳、鄧健明、劉倬昕同許蕙菁等等。
重踏久違嘅舞台開騷，師兄唔單止重燃唱歌嗰團火，佢仲話自信都返晒嚟，師兄提到呢八年，中間好多時候喺內地開騷，忽略咗香港市場，加上嗰陣嘅心態係想收埋自己，亦未有足夠信心，但經過呢晚後，師兄話自信都返嚟啦。
除咗獻唱自己嘅經典作品之外，師兄亦以Medley方式連唱多首快歌，炒熱全場氣氛。嚟緊8 月13號就係師兄50歲生日，好兄弟陳國坤嘅囝囝陳真，手捧巨型漢堡包，為Uncle預祝生日，師兄不知幾驚喜呀！
至於問到佢有咩生日願望？師兄就話好希望可以一圓紅館夢，仲話完騷後會嘗試入紙申請紅館檔期 。師兄呢晚宣布已擺脫自由身狀態，正式簽約新唱片公司重新出發，仲率先演唱新歌《綻放》。
