韓國第5屆青龍系列大獎日前圓滿結束，事前被認為係大熱人選嘅 玄彬 ，最後被 朴海秀 擊敗未能獲得視帝榮銜，不過事前喺紅地氈，兩大型格演員都非常沉靜，似乎心情正為叮噹馬頭嘅賽情而緊張喇。
由偶像轉型為演嘅 朴志訓 因為大熱嘅《菜鳥伙房兵》一齊競逐視帝，心情就似乎輕鬆得多喇，而佢嘅拍檔 尹敬浩 就得到最佳男配角嘉許，劇集亦同時獲頒最優秀作品獎，成為大贏家。
女士方面，視后競爭一樣激烈，好似 金高銀 就以兩套作品同時入圍，不過仍不敵《莎拉的真偽人生》嘅 申惠善 ，不過金高銀就獲大會頒授最高榮譽大賞，同佢一齊參演《柔美的細胞小將3》首次擔正嘅 金載原 勇奪最佳男新人獎。
而人氣明星就分別由 邊佑錫 同 高允貞 奪得，過往曾指自己非常怕參加頒獎禮嘅高允貞，呢日現身紅地氈時狀態自然，似乎已經克服面對人海嘅緊張心情喇。
呢晚再一次由 全炫茂 同 潤娥 第5度合作主持，兩人以襯絕嘅淺色明亮打扮現身，不過全炫茂以極厚底皮鞋力抗拍檔長腿加高踭鞋就成為討論話題。至於一眾出席嘅韓流明星，大家都以華麗打扮出席，場面非常熱鬧。
