憑藉泰國GL劇《我們的秘密》紅遍亞洲嘅港泰混血女神 鄺玲玲 同 Orm 呢對深得觀眾歡心嘅「LingOrm」CP，日前參與電視台舉辦嘅女士運動會，同電視台一眾女星分隊競技。運動會比賽緊張又刺激，各自隸屬兩隊成員嘅「LingOrm」就繼續互動，場面趣味橫生。
兩人於場上比賽時除了要嚴防對手，又忙住關心另一半，同隊隊友為阻止玲玲心思飄向Orm 陣營，甚至即場搞笑將佢監生拉返陣地嘅場面，令全場觀眾大笑。而喺遊戲環節中，Orm展示佢唔輸得嘅勝負欲，又獲玲玲借意護航，令讓場面歡樂度爆棚，兩人仲被取笑唔知係嚟比賽定放閃。
兩人繼《我們的秘密》同《Only You唯有你》大獲成功後，曼近第三度合體主演嘅新劇《繪夢婚禮》一開播就再創驚人佳績！第2集播出24小時內，社交平台討論已火速衝破182萬則，更成為全球熱搜之冠，更成為亞洲多地串流平台榜首。
劇中主角 Runch(鄺玲玲 飾)同Neen(Orm 飾)原本係一對恩愛已婚伴侶，但就面臨家族巨大壓力，仲加上超級毒舌控制狂惡奶奶介入。婆媳衝突更導致感情破裂離婚，但同時又因龐大商業利益同家族繼續合作，被迫掟煲唔掟蓋，繼續假扮恩愛一對，劇情狗血又非常搞笑。
