韓國新男團 EMOTI:M（이모티엠），剛推出首張單曲專輯《CONNECT》，並以主打歌《SPARK》正式出道。 原來負責領唱嘅成員永浩（Yeong Ho）來自香港，因此出道後首個海外行程，就預告出道僅僅9日，就會於星期六（8日）襲港。團名「EMOTI:M」由EMOTION（感情）同MUSIC（音樂）結合而成，有音樂與情感連結嘅意思，希望透過音樂傳遞情感，互相支持同安慰，將不同世界嘅大家連結一齊。
團體由5名極具舞台實力嘅年輕男生組成；包括隊長同Rapper周玹（Ju Hyun）、領唱永浩（Yeong Ho）、副唱玲（Rei）、主唱攢燏（Chan Yul）以及領舞振源（Jin Won）。其中永浩同玲分別來自香港同日本，現年21歲嘅永浩隻身勇闖韓國追夢並成功出道，唔止擁有精湛唱功，更擅長製作3D動畫，為團隊增添多元化創作才藝。
DNA Entertainment1月已宣布全新男團EMOTI:M企劃，起初仲非常神秘，先公開5名成員童年照，隨即引起外界關注。其後5月先公開成員真面目，清新俊俏造型大獲好評。EMOTI:M未正式出道前，已成功於網上累積高人氣，透過挑戰跳唱人氣男團TWS歌曲《Countdown！》、BOYNEXTDOOR嘅《Earth, Wind & Fire》、Cortis嘅《RED RED》同BTS嘅《2.0》等，於社交平台吸引超過40萬粉絲關注，相關影片總點讚數目更突破540萬，播放量更達570萬次，成為矚目K-Pop新星。
上月31日EMOTI:M先推出首張單曲專輯《CONNECT》，當中收錄融合強烈節奏嘅出道舞曲《SPARK》。成員周玹、振源同攢燏更參與作詞，展現豐富音樂才華。EMOTI:M更已攜新歌登上韓國各大音樂節目。
EMOTI:M出道僅短短9日就即將來港，今個星期六會到訪極有香港特色嘅中環街巿演出。屆時將會演唱新歌，成員仲指已準備就緒，非常期待與香港嘅MOTI近距離見面。