陳意涵 與導演老公 許富翔 結婚多年，二人育有一子一女，陳意涵不時會喺社交平台分享日常生活，早前佢因為意外發現老公偷偷買嘅戶外用飯鍋，拍片擺到網上同網民分享「老公的無用東西」，影片意外爆紅，引起網民熱烈討論，最後更衍生出「老公的廢物系列」影片。原本以為係一場妻子吐槽老公亂買嘢嘅搞笑鬧劇，但估唔到最新一集許富翔靠「泥水」證明自己！
繼第一集開箱老公買嘅戶外飯鍋後，第二彈陳意涵就開箱一個「藍色巨蛋」，片中由意涵 囝囝丹丹以小推車推住一個藍色蛋型嘅神祕裝置登場，陳意涵見到即疑惑地問囝囝呢個係咩東東？丹丹即興奮直表示係：「洗澡的工具！」，之後更興奮到當場除衫準備體驗。
面對呢個藍色巨蛋，陳意涵忍唔住爆金句：「如果你去荒郊野外不能洗澡，還要帶這麼大的東西，那本身就是有問題吧！」雖然許富翔為此極力護航，仲強調只要有電有水，就可以令大家喺戶外都可以沖到熱水涼，但當佢問到丹丹厲不厲害時，丹丹冷不防一句：「so so（普通）」，即令大家笑翻現場。
而最新一集「老公的廢物系列」中，許富翔為證明自己買嘅嘢絕對唔係廢物，佢除咗拎出「電動攜帶式淨水器」外，仲特意準備咁一盆以抽濕機廢水為基底，混合泥土、石頭與落葉嘅「泥水特調」，當場宣告自己要將呢盆水過濾後嚟飲！
起初陳意涵一臉難以置信嘅表情望住老公，仲話自己一定唔會飲，但除住淨水器運轉後，過濾出極清澈透明嘅水後，陳意涵表情變得相當驚訝，而當許富翔拎出檢測紙檢測水質，結果顯示水質相當乾淨後，許富翔即場品嚐呢杯令佢一雪前恥嘅清水，並對鏡頭露出春風得意嘅表情，而陳意涵亦以不情不願嘅表情，勉強抿咗一口，但佢驚訝表示：「真的很正常！有點不錯耶！」不過，傲嬌嘅陳意涵喺鏡頭前依然唔肯公開讚老公，最後貼心嘅丹丹湊近鏡頭幫媽媽大聲表示：「這個有點不錯耶！」為呢場溫馨又搞笑嘅開箱劃下完美句點。
