聲稱主打高科技咖啡項目嘅投資公司「Fun Coffee」，近日涉嫌因以研發多功能咖啡設備、咖啡基因研發，遊說投資者以虛擬貨幣投資為名進行龐氏騙局，於香港共接獲逾225宗舉報、涉款高達9400萬元。香港警方同澳門司警採取聯合執法行動，已拘捕8名包括公司董事、股東及宣傳骨幹等涉案疑犯。
「Fun Coffee」去年底曾於西九文化區舉辦馬拉松活動，網上資料可見除香港投資者參與外，亦有東南亞各地嘅人士來港參加，而活動當日就邀請 阮兆祥 擔任現場主持。而隨住公司疑涉及騙局，亦令祥仔意外捲入輿論風波。
面對網上熱議，祥仔亦隨即於社交平台公開回應劃清界線，澄清自己當時只係應邀擔任活動大會主持，絕對未有參與介紹任何投資產品同促銷，對公司私下商業運作同非法行為概不知情，期望公眾切勿受到誤導。
