陳柏宇Jason 早前完成一連三場20週年演唱會，期間佢除咗首唱由 馮允謙Jay 作曲嘅演唱會主題曲〈快照〉外，仲喺第二場邀請到Jay做嘉賓，合唱呢首歌嘅英文版 demo。呢首演唱會主題曲MV近日正式上架，當中特別輯錄咗由籌備到正式演出嘅珍貴片段，包括：練歌、入台綵排及台上表演嘅畫面。
Jason 表示喺邀歌時，強調唔使Jay為刻意為佢量身打造，唯一要求係寫出佢自己喜歡且感到自豪嘅作品。提到呢次合作，Jay話當初聽完Jason嘅要求都有啲「𢯎頭」，後來聽完Jason嘅舊作，先決定跳出情歌框架，寫啲喺 Jason library 唔會成日聽到嘅作品。
Jay 指自己創作時代入咗Jason嘅父親身份，思考對方想教小朋友啲咩：「突然間我就諗到最 simple form 去講人生就係『up and down』！所以就寫成而家 demo 嘅 hookline，去解釋人生好似 roller coaster 咁一定會有起伏。」而這句 hookline 亦成為詞人雷暐樂嘅靈感來源：「諗起去主題樂園玩過山車最後衝落去嗰下會影張『快照』。張相捕捉咗呢趟旅程當下最真實嘅情緒，有幾投入、點投入法，會喺張相度睇得一清二楚。」
