上星期大結局嘅劇集《非份之罪》收視口碑雙贏，台前幕後8月4號晚舉行慶功宴，齊賀劇集創佳績，監製王心慰亦好開心劇集為佢退休生涯添上一個光環。
喺劇入面唔同嘅單元故事都有精彩之處，好似 徐榮 同 陳煒 呢對智障人夫配上美女妻子嘅家庭，故事耐人尋味，連煒哥自己煲返套劇時都覺得自己衰到貼地，好彩冇令觀眾反感，反而討論度爆燈，兩人都好開心劇集受觀眾歡迎，而且再掀煲劇潮。林秀怡都話有朋友透露，劇集令佢放低咗個電話一小時。
阮浩棕 、 劉佩玥 同 何沛珈 嘅三角戀單元曲折離奇，Angie被揭開殺人真面目時䧟入崩潰狀態，拎住把刀同游有方對峙嘅一幕演技爆發獲讚，亦有網民戥阿Moon要拎住把刀咁耐好辛苦，兩人都有講解返拍攝呢場戲時嘅情況。此外，Nic憑劇中角色圈粉，好多粉絲更大讚佢靚仔。
吳偉豪 今次飾演嘅奸角可以話成功幫佢擺脫乖乖仔角色形象，因為劇集出街後觸發網民鬧爆，不過Ricco自知角色衰格，唔敢反駁網民，反而想趁機向觀眾解釋只係角色所需，佢真正性格並唔係咁樣。
