黃劍文 獲Kimchi family同佢慶祝43歲生日，粉絲們為咗賀kimman籌備咗三年嘅專輯推出成績理想，特別將Cover製成加大版海報送俾Kimman令佢非常感動。
活動上Kimman除咗獻唱之外，更突然換上韓服化身Oppa，點知一班Kimchi都好投入，早有準備一齊悉心打扮著上韓服，送咗個驚喜俾Kimman，搞到好似皇上選妃子嘅場面一樣。
Kimman大讚一班Kimchi好貼心，因為最初只係以為以韓式做主題，冇估佢哋個個都咁認真，專登喺網上買套韓服嚟裝扮。至於今年生日願望就係想再製作更多歌曲，因為過去一年Kimman涉獵咗三個主持項目，未來想花時間製作歌曲。
講開做主持，Kimman加入《流行都巿》成為主持人之一，佢好開心可以喺唔同領域作新嘗試，特別感謝張美妮以及節目不同單位仲有主持人，個個都好用心教導佢，令佢做節目之餘一同學習成長。
另外早前Kimman就同一大班朋友暢遊韓國，食買玩都大有收穫，而且發掘咗好多買衫扮靚好去處，深深被韓國吸引，已經計劃要再去多次掃貨呀﹗