吳岱融 與太太 鍾淑慧 久未喺香港公開場合露面，呢日夫妻檔出席一個美容品牌開幕禮，66歲岱融哥出咗名係型佬，保養秘訣就係做運動同保持心情愉快，仲要不時為太太製造驚喜，二人更打情罵俏盡顯恩愛。
岱融哥話開完工有時會靜悄悄提早一日返屋企畀驚喜太太，而太太就會好開心撲埋嚟，岱融哥笑言目的係想睇太太有冇「其他嘢」吖嘛！鍾淑慧聞言即哈哈大笑。
岱融哥仲呻雖然知道太太嘅愛意，但係太太對阿仔講嘢嘅態度係唔同，轉聲轉得好快。問到阿仔有冇帶啲女友畀佢哋過目，岱融哥笑稱自己都想帶啲女朋友畀阿仔過目，鍾淑慧聞言即輕輕拍老公背脊，岱融哥盼望兒子早日成家立室，認恨飲新抱茶。
另一位代言人肥媽帶埋《中聲》歌手沈宗賢、涂家堯、郭偉倫同侯靜伊撐場，肥媽日前飛去大馬出席楊明同莊思明嘅婚禮，當日氣氛好似一個大家庭咁，聽到一對新人嘅感言，肥媽都不停喊，睇到AI影片聽到莊爸爸講「楊明，我將個女交畀你」，更被感動到爆喊。
