今個星期繼續由主播王鎮泉JeoffreyWong 為觀眾送上電影消息，全球大收超過14億票房嘅真人版電影《Barbie芭比》，一直都好大呼聲話會推出續集，不過就遲遲都未有最新消息。

有傳聞就指電影公司方面，同導演、編劇及製片兼女主角嘅Margot Robbie 同男主角Ryan Gosling仲未傾掂數，主要原因應該係同主創人員嘅薪酬過高有關，以Ryan Gosling為例，佢開出嘅條件係二千萬美元，再加額外嘅票房利潤分成，相信呢個亦係電影公司一直未肯答應嘅理由。

本週新片速遞

《帶你去見我媽》：澤凱同靜姍交往兩年，相當幸福，但係澤凱喺汕頭老家嘅媽媽，知道靜姍曾經有過一段婚姻之後，覺得受到莫大傷害，情緒化之下執意要阿仔同對方分開，兩母子因而大吵一場。雖然最終不歡而散，但澤凱都係顧及阿媽感受，慢慢同靜姍疏遠，而喺兩人分開後，媽媽開始反思自己，仲親自去挽回呢對被佢拆散嘅情侶。

《美味倒數》：每當夏民品嚐母親親手煮嘅餸，眼前總會浮現一組莫名嘅數字，每食一餐，數字就會隨之減一，當倒數至零，就係母親撒手人寰之時。為咗守護母親餘下歲月，夏民狠心逃避媽媽嘅餸。母子人生像受了詛咒，相依為命但係就漸行漸遠。女友決意修補破碎一家，到底係好心做壞事，抑或換個角度，不幸亦有出路？

《劇場版 CHIIKAWA 人魚島的秘密》：某日，吉伊卡哇與小八喺廣場休息時，兔兔突然帶住貼喺臉上嘅傳單出現，小八發現呢張係「特別島嶼招待」嘅邀請函，上面寫有「島上的簡單討伐就能獲得100倍報酬」、「限定島拉麵與限定甜點，甜的辣的全部實質免費」等等嘅誘人字眼。被吸引的吉伊卡哇一行人，連同對傳單內容感到懷疑嘅水獺，一起搭船前往島上。登島後等待著佢哋嘅，究竟係點樣嘅驚喜與冒險呢？

泉叔派福利又返嚟喇！今次答啱問題又被抽中嘅十位觀眾朋友，就可以各獲得電影《劇場版 CHIIKAWA 人魚島的秘密》嘅換票証兩張。

問題：喺電影《劇場版Chiikawa 人魚島的秘密》裡面，係邊個將特別島嶼邀請函帶俾Chiikawa同小八㗎呢？

知道答案嘅朋友記得喺8月6號，晚上十點至十二點期間，私信到「TVB 娛樂新聞台Facebook專頁」，註明《電影泉攻略·泉叔派福利》，記得十點前send嚟嘅答案係唔算數㗎！

今個星期香港票房龍虎榜，截至8月5 中午，第1位《蜘蛛俠：英雄重生》第2位《奧德賽》、第3位《電影多啦A夢：新・大雄之海底鬼岩城》。