資深演員兼殿堂級填詞人 黎彼得 於8月5日病逝，享年76歲。據知黎彼得今年初入住護老院，三月因中風暈倒，一直卧床休養，身體機能逐漸衰退，最終與世長辭。
黎彼得兒子 黎樹德 及好友 鍾志光 於6號會見傳媒交代其後事安排，鍾仔指按照家人意願想低調處理，澄清黎彼得並非經濟唔掂，二人相識以嚟，對方未向佢借過一毫子，黎彼得當時冇主動搵「大劉」劉鑾雄資助，而係劉鑾雄透過基金會主動伸出援手，並引述劉生嘅說話，指對方係好欣賞黎生喺經典電影《小男人周記》飾演「大古惑」一角，覺得黎彼得值得幫助。鍾仔話黎彼得後事安排由家人商議中，一切都尊重家人意願，希望各位畀啲空間佢哋去處理。
黎彼得於2021年突然因心臟血管堵塞，緊急接受「通波仔」手術，舊年佢又因感染流感導致呼吸困難，入深切治療部留醫，期間醫生更發現佢貧血、糖尿病，腎功能指數過高，出院後仲瘦咗十幾磅。
面對龐大醫療開支，黎彼得經濟陷入極大危機，契仔 黃宗澤 主動出手相助解困，令黎彼得相當感動，大讚Bosco有情有義。 雖然身體大不如前，但黎彼得仍然有開工，並轉戰做網絡節目主持，經常喺節目中大爆陳年娛圈秘聞，後來佢嘅健康狀況反覆，節目曾暫停更新，喺舊年12月，更搵嚟好友鍾志光幫手一齊主持，而最後一次出片係今年6月11日，片中所見佢身形消瘦，精神尚算唔錯，仲同鍾仔討論世界盃話題，雖然有指呢條片係黎彼得中風前預錄嘅內容，卻成為佢演藝生涯謝幕之作。 
黎彼得一生充滿傳奇色彩，只有小五學歷，12歲開始打工養家，做過洗廁所、司機等基層工作，後來憑住佢嘅才華，成為一代填詞巨匠。黎彼得獲「歌神」許冠傑賞識，兩人合作無間，聯手打造咗多首貼地又反映香港基層心聲嘅經典金曲《浪子心聲》、《打雀英雄傳》、《梨渦淺笑》等。
許冠傑得悉故友黎彼得離世後，亦有喺社交平台，上載咗一張親手寫嘅悼念文，多謝故友為香港樂壇創出無產數精彩嘅作品。黎彼得曾為當時樂壇天王天后打造多首金曲，好似張國榮嘅《Moncia》、梅艷芳嘅《將冰山劈開》、譚詠麟嘅《天邊一隻雁》、羅文嘅《激光中》等。 黎彼得一生共創作咗 300 多首作品，佢更同黃霑、盧國沾、鄭國江並稱為「香港第一代四大詞人」。 
黎彼得喺90年代有唔少幕前演出，經常喺TVB劇集演活咗無數小人物角色，深受歡眾喜愛，近年黎彼得喺《愛・回家之開心速遞》演豹叔一角，更係令人深入民心，佢同劉丹、羅樂林、陳榮峻三位老戲骨共同組成耆英 Hip Hop 組合大四喜。
