羅啟豪 六月開完兩場紅館騷，等咗兩個月，一班豪殼終於又可以近距離聽到Ramon唱歌。呢日佢揀喺live house舉行小型音樂會，除咗自己嘅歌，亦都唱咗好多私心歌單，好似有陳潔靈嘅《當天那真我》，以及王菲嘅經典國語歌《執迷不悔》。
由於音樂會舉行當日傳出資深填詞人 黎彼得 離世嘅消息，Ramon特別臨時更改歌單，加唱一首《浪子心聲》向呢位樂壇前輩致敬。Ramon話自己雖然冇見過黎彼得真人，但因為佢幫自己嘅偶像梅艷芳寫過好多歌，所以一直都好敬佩呢位前輩。
《中年好聲音4》再過兩個星期就到總決賽，Ramon預告自己當晚都有份演出，除此以外，佢仲透露11月將會同黃博一齊喺廣州開騷，Ramon話自己一直好鍾意黃博首《有一種執著》，希望到時可以同博博合唱，或者幫對方和音。
