黃婉曼（Icy）身兼 KOL、主持及兩女之母，日前以最佳狀態現身銅鑼灣出席一連六日嘅預防醫學活動。黃婉曼即場分享點樣喺繁忙工作與家庭生活間保持凍齡狀態外，更親身做健康檢測，黃婉曼轉戰做KOL後，日日要低頭睇電話剪片、執相，黃婉曼坦言一直有斜視、翹腳及肩頸痛等問題。
黃婉曼笑言以前只知道自己肩頸痛，而家先知痛症源於姿勢不當及肌肉張力問題：「話如果做返啱運動、糾正返姿勢，應該可以高返 6cm！」黃婉曼現時每日都有堅持做伸展運動修整體態，避免將來年長時出現駝背或骨質流失跌倒等風險。
黃婉曼直認心廣體胖，話最近暑假帶完小朋友旅行返嚟，夜瞓又食多咗嘢，除咗今年暑假跟阿女學游水，黃婉曼亦分享夫妻間嘅健康相處之道，透露自己近期熱衷於做Pilates拉筋與鍛鍊核心肌肉，覺得效果極佳後就叫老公一齊試。
黃婉曼覺得自己嘅凍齡心法，靠做運動維持身體健康外，最重要就係保持「童心」與簡單心態，「年輕時大學畢業就開始跑步、跳繩做保養，但人到中年，最重要係減少煩惱、減少內耗。將事情諗得簡單啲，心態平靜，個人睇落自然就年輕得多！」
談到如何在繁忙工作與照顧家庭之間保持心情平靜，黃婉曼坦言自己以前容易焦慮，自從照顧兩個女兒後，EQ簡直提升咗好幾個檔次，慢慢累積經驗，個人就平靜好多，任何困境都唔再係問題。
