年前參與《衝上雲霄大選》獲得冠軍，其後重投航空業繼續翱翔天際嘅 麥大力，去年迎娶 簡淑兒 ，之後就不時放閃，一有時間又會拍拖到世界各地旅行二人世界，近日夫妻又到大阪玩，不過操控鐵鳥一絲不苟嘅佢，對老婆就似乎不解溫柔變作死老公，仲公開擺上網「茅廁點燈」，真係要祝福佢好運先得喇。
麥大力近日公開同老婆Jessica到大阪嘅圖輯，張張都寫有圖片說明，好似第一張就喺當地道頓堀嘅地票跑跑人打卡，仲標明話係老婆要自己咁做，再加幾點似乎略為嫌棄，已經可以話罪證確鑿喇。
到另一張坐喺Cafe外嘅相，又寫明話老婆要自己表現得自然啲，似係唔多耐煩喎，點知都未係戲肉，之後輪到Jessica上鏡，麥大力寫道話老婆指張相影到自己又矮又肥，要佢再影過，以為故事就咁影多兩張老婆大人滿意就過去小命得保？少年你就真係太年輕喇。
因為下一張，麥機長竟然大膽到寫明話，我答佢：咁你係咁嘅樣嘛。
來賓請上前行禮，我哋一齊懷念呢位勇士～～～～之後嘅結果佢都自己寫哂出嚟喇，之後老婆就不瞅不睬嬲豬啦大佬呀。麥先生而家就開始擔心，仲呼籲大家如果佢不知所縱嘅話，記得要去搜索佢所在喎。搵你冇問題呀麥生，不過你氹好夫人先啦，唔係連去搵你嘅大家都被牽連就唔好啦，都係嗰句，Good Luck啦吓～
