去年於《女神配對計劃》中大膽告白、成功同女神 葉蒨文 配對成為一對嘅「GM」曾展望，日前先同Sophie高調慶祝甜蜜交往一周年，感情非常穩定。而除主持同演員身份之外，GM其實仲係「七品道士」，近日就以佢嘅知識打救仍在情海中孤身漂浮嘅一眾單身男女呀。
身為「成功脫單代表」兼正牌道長嘅GM，於社交平台化身拯救Dry爆單身男女，傳授七夕招桃花秘技！GM指月中即將來臨嘅七夕(8月19日 星期三)唔止係牛郎織女相會之日，更係俗稱七姐嘅織女誕辰，堪稱全年中最適合求姻緣嘅日子之一。
GM又整理「七夕拜七姐脫單步驟」：
1：參與祈福法會：前往供奉七姐嘅寺廟或道觀參拜，或者直接報名參加七夕祈福法會。
2：供奉美妝用品後加持桃花：參拜時可帶上全新未拆封香水、化妝品或面霜等供奉七姐。供奉後日常使用，就如獲七姐加持，能大幅提升個人嘅人緣同異性緣。
3：有伴侶者求永結同心：七夕唔止適合單身者求姻緣，已脫單或有伴侶一樣可以參拜，祈求與伴侶永結同心、長長久久。
最後GM仲貼心話，如果大家想了解更多拜七姐小貼士同細節，歡於佢社交平台留言及問，佢將會親自解答，解救情海中嘅迷途小羔羊咁話。
