胡宇威同陳庭妮日前無預警喺網上宣布升呢新手父母，妮妮懷孕期間曾經出席電影宣傳活動，但完全睇唔出孕肚，其實妮妮發現懷孕一刻，宇威喺外地拍緊戲，妮妮都忍到老公返台灣先親口報喜，忍功真係一流。
宇威話自己見到BB嘅超聲波相呆咗幾秒，直到同太太確認真係懷孕，先意識到自己即將做爸爸。宇威仲話見證太太由懷孕到生產，過程中有好多辛苦，深刻體會到母愛嘅偉大，所以自己喺陪產過程都忍唔住喊。而佢都有親手幫BB剪臍帶，因為覺得係一種真正做爸爸嘅儀式。
雖然宇威44歲先做爸爸，但原來囡囡嘅英文名Caitlin，佢16歲嗰陣已經諗定。除咗女仔名，佢連男仔名都諗好晒，睇嚟佢哋兩公婆好大機會會生夠一男一女，湊成一個好字。
